Arwyddo Ewyllys yn

Yn ein byd technolegol ni heddiw, gallwch fancio ar-lein, prynu da byw mewn ocsiwn trwy ddefnyddio ap, a chwblhau eich ffurflen dreth o fwrdd y gegin. Ond beth am arwyddo un o’r dogfennau pwysicaf fydd angen arnoch – eich Ewyllys?

O dan y gyfraith yng Nghymru a Lloegr ar hyn o bryd, rhaid i Ewyllys gael ei arwyddo mewn inc gan y person sy’n ei wneud (yr Ewyllysiwr), a’i dystio gan ddau berson annibynnol, sydd hefyd yn gorfod arwyddo mewn inc o flaen yr Ewyllysiwr. Mae Ewyllysiau o hyd yn parhau i fod yn un o’r ychydig ddogfennau cyfreithiol y mae’r gyfraith yn mynnu eu bod yn cael eu llofnodi’n gorfforol ag inc yng Nghymru a Lloegr.

Yn ystod pandemig COVID-19, cyflwynodd y Llywodraeth gyfraith dros dro a oedd yn caniatáu i Ewyllysiau gael eu tystio o bell drwy alwad fideo. Gwnaeth hyn bethau’n haws yn ystod y cyfnodau clo gyda’r cyfreithiau cadw pellter cymdeithasol, ond roedd llofnodion corfforol o hyd yn ofynnol. Daeth y rheol dros dro honno i ben yn gynnar yn 2024, gan olygu bod angen dychwelyd at dystio Ewyllysiau yn y ddull bersonol draddodiadol.

Ers y pandemig, mae’r drafodaeth ynghylch Ewyllysiau electronig, neu e-Ewyllysiau, wedi ennill momentwm. I lawer o deuluoedd, yn enwedig y rhai sy’n byw mewn ardaloedd anghysbell, nid yw cyrraedd Cyfreithiwr wyneb yn wyneb bob amser yn hawdd. Gallai e-Ewyllysiau gynnig mwy o hyblygrwydd, lleihau amser teithio, a’i wneud hi’n haws diweddaru Ewyllysiau wrth i amgylchiadau newid. Gall llofnodi’n ddigidol a thystio dros fideo hefyd ychwanegu tryloywder at y broses o lunio Ewyllys ac o bosib helpu lleihau anghydfodau posibl yn y dyfodol.

Fodd bynnag, nid yw e-Ewyllysiau yn opsiwn perffaith o bell ffordd. Un pryder sylweddol yw’r diffyg rhyngweithio dynol uniongyrchol, a allai gynyddu’r risg o dwyllo neu dylanwad amhriodol gan deulu a ffrindiau’n sylweddol.  Heb gyswllt wyneb yn wyneb, mae hefyd yn anoddach gwirio gallu meddyliol yr Ewyllysiwr neu cadarnhau bod yr Ewyllys wirioneddol yn adlewyrchu bwriadau gwirioneddol yr Ewyllysiwr. Yn ogystal, gall sawl her ymarferol godi – er enghraifft, gall dogfennau digidol fod yn fwy agored i newidiadau heb awdurdod neu ymyrraeth.

Mae Comisiwn y Gyfraith wrthi’n adolygu’r gyfraith ar Ewyllysiau, gan gynnwys y posibilrwydd o ganiatáu Ewyllysiau electronig llawn yn y dyfodol. Ac er na fydd newid dros nos, mae yna gydnabyddiaeth gynyddol bod angen i’r gyfraith adlewyrchu realiti modern tra’n dal i amddiffyn dymuniadau pobl.

Hyd nes y bydd y gyfraith yn newid, mae’n hanfodol sicrhau bod eich Ewyllys wedi’i lofnodi a’i thystio’n gywir. Os yw symudedd neu bellter yn broblem, siaradwch â’ch Cyfreithiwr am drefnu llofnodi mewn lleoliad diogel a chyfreithiol – mae llawer bellach yn cynnig ymweliadau cartref neu opsiynnau cadw pellter cymdeithasol.

Mae’n debygol y bydd technoleg yn chwarae rhan fwy yn nyfodol llunio Ewyllysiau, ond am y tro, does dim byd yn well na rhoi phen ar bapur gyda chyngor cyfreithiol da wrth eich ochr.

Os hoffech unrhyw gyngor am unrhyw fater cyfreithiol, cysylltwch gyda’n tîm ar 01678 444 005 neu nfu@agriadvisor.co.uk. Gall aelodau NFU Cymru sydd wedi tanysgrifio i’r Cynllun Cymorth Cyfreithiol fanteisio hefyd o wasanaeth Gwiriad Iechyd Cyfreithiol yr NFU tuag at gyngor cynllunio olyniaeth a threth.

Gan Hannah Powell – Gyfreithwraig